炳記麵家

營業中

休息中

港島區人原本入跑馬地食老麥雲吞麵，點知馬場改道入唔到跑馬地，逼住去咗香港仔隧道，咁就喺香港仔搵嘢食。剛剛好見到田灣附近有一間魚蛋粉麵店 — 炳記。我叫咗一碗牛腩河；屋企人叫咗紫菜四寶麵，兩碟油菜，我另外再叫咗淨紫菜四寶。牛腩河上湯好味，河粉係用幼河粉，牛腩入味，唔算天花板級鬆化，但以$35一碗價錢，可以收貨。紫菜四寶，絕對推介，魚皮餃唔會食到一口油，魚紮亦都十分好味，牛丸有牛味。最後想講一句，呢間舖頭個老闆應該同我一樣有強迫症。個男洗手間係我喺香港茶餐廳級數嘅地方從來未見過咁乾淨（講緊係五星級酒店洗手間嘅乾淨）；每張枱嘅枱面都係實驗室級數嘅乾淨。每次去到日本嘅餐廳用完佢哋嘅洗手間，都會好感嘆點解香港人永遠做唔好洗手間嘅衛生。今日炳記嘅老闆就用行動證明咗我嘅諗法係錯嘅，只要有心就會做得好！