新麻蒲 BBQ (已結業)

想試試新開嘅新麻蒲韓燒，點知夜晚已經full booking，唯有選擇晏就去食lunch啦。新麻蒲嘅格局好有韓國風味，令食客好似置身韓國咁。 兩個人叫咗個芝味烤肉套餐，包前菜、和牛壽司、牛肉、雞翼、拼盤、飲品同埋甜品，當然唔少得靠爐旁邊熱力融化嘅芝士邊啦！可能期望越大，失望越大。個人認為半生熟嘅牛肉壽司有D過韌，烤肉亦都太鹹，掩蓋咗肉嘅味道。芝士邊加咗蘑菇食落好似食緊pizza上面個種芝士，有D奇怪，同烤肉格格不入。而且，芝士好快就會燒燶，一開始就要食哂佢，又冇得refill，的確令人有D失望。雖然食物唔算非常出色，但呢間餐廳都有佢抵讚嘅地方。首先侍應非常友善，耐唔耐會行過來幫我地燒肉，又幫我地剪走燒燶嘅部分。另外，叫套餐一次過可以試到好多種類嘅食物，唔係淨係得肉。我地最後叫嘅甜品係黃豆粉刨冰，味道唔錯好足料，而且非常大碗，但食完都唔會太濟。2人套餐份量都幾多，如過唔想食到好似我地咁太飽可以3個人分。呢個價錢食咁嘅質素嘅韓燒好似唔係好抵，不過呢個咁地道嘅韓燒有興趣嘅朋友都可以試一試，但係我地就應該冇下次。