一盛極牛 (已結業)

一向愛食拉麵，呢日就慕名來到主打牛骨湯拉麵嘅一盛極牛。小店位置較為刁鑽，不過平日晚市都唔少人。餐廳將成份一一列明，湯底以帶骨髓嘅牛骨湯熬二十小時而成，除咗牛味香濃之外，亦能補力氣和暖身。選用嘅和牛亦好講究，係來自熊本縣嘅『和王』，和王數量稀少，而且仲有要求一定要BMS油花標準等級達到6以上，啱晒我哋兩個對牛有要求嘅牛魔王！一如其他日本小店，一盛極牛貴精不貴多，只賣三樣食品－－極牛拉麵、白牛拉麵及牛肉飯。而和牛部分只分為和牛刺身同火焰和牛。點咗一碗和牛刺身白牛拉麵(2分 $158）以及火焰和牛極牛拉麵。白牛拉麵嘅分別在於湯頭加咗白松露，一上枱已經聞到陣陣松露香，令人食慾大開。雖然略為蓋過牛骨湯嘅原味，但仍然值得推薦。和牛刺身我哋選咗2分，只有矜貴嘅兩片，和牛脂肪分佈平均，入口軟嫩充滿油香，正！火焰和牛極牛拉麵則可以更加食到牛骨湯嘅精髓，牛骨湯鮮甜清醇，我哋忍唔住飲到一啖接一啖！通常牛肉燒過後，肉味會更加突出，火焰和牛亦唔例外，比刺身更重牛味，我個人更加鍾意。溏心蛋流心度滿意。小店用嘅真空雞卵麵都好有水準，可以選唔同硬度，我選咗普通硬度，入口掛汁兼有彈性！整體都唔錯，會回頭！