藍象泰國餐廳 (已結業)

約咗同事收工一齊出尖沙咀行街食飯，呢晚我地食泰國菜🥰藍象當然以藍色為主，裝修甚有格調。食物選擇多，有頭盤、沙律、湯、海鮮、肉類、飯麵、野菜、配菜&甜品。飲品方面除咗有泰式特飲，仲有唔少酒類！🐘牛油果大蝦沙律 $128牛油果香濃滑溜，大蝦爽口彈牙，醬汁酸甜開胃，仲有香茅同檸檬葉嘅香氣，好清新！🐘小食拼盤 $168泰式沙嗲雞串x2泰式沙嗲豬串x2脆皮青咖喱黃金包x2藍象炸蝦餅x2馬可慢煮花生軟糖配新鮮菠蘿x2串燒外層略帶焦脆，肉質保持嫩滑，配埋沙嗲醬，確實惹味！脆皮黃金包，內餡係青咖喱豬肉。蝦餅鮮味彈牙，外皮非常香脆。花生軟糖香濃煙韌，仲有花生粒，口感豐富，配埋新鮮菠蘿，清甜中帶點酸，可消去炸物嘅油膩感。🐘菠蘿雞肉炒飯 $138份量好多！炒飯有新鮮菠蘿粒，提子乾，腰果，肉鬆，飯粒炒得均匀乾身，粒粒分明，味道酸甜開胃。🐘暖心榴槤撻 $108有驚喜嘅甜品！榴槤暖暖地，食落味道更濃郁，口感更幼滑！外層撻皮酥脆！再配上冰凍雲呢嗱雪糕，層次豐富。