POP vegan (已結業)

難得同會食素嘅朋友食飯，一定會揀食素。疫情下唔去銅鑼灣呢啲逼人地，揀蘇豪都唔錯。間餐廳幾有趣，完全分開左兩邊。檯距好好，呢個時勢起碼食得安心先。Vegan buffalo wings: 完全唔知點解叫wings, 叫韓式炸雞啦。質感都似雞，炸得唔錯，個醬夠惹味，最初見佢餐牌兩隻辣椒，都驚會好辣，但唔係好食辣嘅我都覺得ok.Tuna sushi roll: 非常大舊。響美國食啲壽司都無咁大舊。食係因為想試個魚生。真係好似，個質感都似。但好可惜竟然係壽司飯完全唔得。個飯嘅質素係雪左兩日嘅百佳壽司質素，乾夾硬。Watermelon steak: 因為好奇佢點將件西瓜變做steak 所以叫，個樣其實似生牛肉多啲，質感其實唔似牛扒嘅，但佢真係有肉韌韌哋嘅質感。主要其實係靠個醋去調味。整體覺得怪怪地，但都食曬。Sangria: 叫一渣抵飲。都整得幾好味。生果量都ok 啦。服務都ok. 個waitress 好後生. 暑期工咁樣. 但佢連sangria 都叫唔出. 攞過黎仲問返我哋點叫。喂～暑期工都認真啲吖！邊有餐廳員工會連自己餐牌啲字都唔識讀架？！總結：食物質素不過不失。冇叫個sushi 會好好多。