炳記牛牛 (已結業)

101123 星期二 | 跟媽媽到深水埗尋找舊日的足跡，行得累了，又到午飯時間了，剛巧經過炳記牛牛，見店舖前的落地大玻璃寫著好多款的甜品，就是其中的蛋白燉鮮奶吸引了媽媽要入去試試，除了甜品，這裡還有午飯套餐提供的，我們點了個特色豬扒焗飯配熱阿華田，再加個小食，牛油焗帶子，當然唔少得甜品喇，要了個蛋白燉鮮奶和木瓜燉鮮奶。特色豬扒焗飯配熱阿華田 ($26)，睇唔到又食唔到有甚麼特色喔，都係一般的蕃茄洋葱豬扒飯，但就只係得一塊豬扒，剪開四件，飯的分量就都幾多，唔通特色就是餸少飯多？牛油焗帶子 ($12)，唔熱嘅，帶子似乎只是預先焯熟，上枱前才加點醬油和少許芝士醬，所以唔入味。蛋白燉鮮奶 ($12)和木瓜燉鮮奶 ($12)，本想要熱的，可惜只得凍的，也算吧，叫得做牛牛，猜想燉鮮奶有一定的水準，冷熱都好吃吧，但單看個樣，好唔新鮮喎，尤其是個木瓜燉鮮奶，好似已存放了成個月咁，不過既然點了就試吓食喇，甜度適中，但唔夠滑，木瓜燉鮮奶更是鞋十十，木瓜又帶點苦，很失敗，好在無拉肚子啫。