文鼎酒家 (已結業)

樓下【南方舞廳】食評，結尾係咁寫嘅…“會不會再來 ? 只要有人生日都有機會再來。”機會終於嚟啦，因為上個月尾我生日，佢就係約咗我去【文鼎酒家】！當晚一行十個人，食咩餸……當然由【南方舞廳】發辦，先嚟幾個小食，包括味道OK，但唔算好突出‧再嚟個湯，應該係花膠燉唔知咩…見個湯底咁濃，都知靠得住，一飲…潤呀~~「包公牛小排」，肉質超腍兼超級入味，忍唔住叫咗碗飯撈一撈！跟住再嚟「金牌扣肉」，樣就好出色，但又唔係我期望咁好味！確實有斗零失望……「苔香九肚魚」，外極脆內超滑，正！「炒年糕」，味道唔錯！唔知咩娃娃菜，一樣好味！連碟普普通通嘅「薑汁炒芥蘭」，D芥蘭可以炒到咁鮮嫩爽口，真係愈簡單愈見真章！臨尾嚟個生煎包，皮脆肉嫩Juicy，無話可說！當然最後例牌嚟個生日必選，成個足球咁大嘅「東方之珠」，以為係Gimmick嘢，估唔到食落又好好味，雖然油膩咗少少！呢餐生日飯，又好味又唔使俾錢，正！不過偷聽到佢地一人夾 $480，嘩！所以我嘅結論係……同【南方舞廳】一樣，對【文鼎】感到非常滿意！但我嘅結尾果句，就會同佢有少少分別……“會不會再來 ? 下次我生日，都希望朋友請我來食多次！”