Thai-ger (已搬遷) 新店位置

星期六放工去D2 place睇下有咩食，上電梯行前少少見到門口Menu有船麵就決定食呢間，喺出面收銀落完單就揾位坐低。餐廳開放式，舖面唔大，枱與枱之間距離較近，一直keep 住好多人食。泰式船麵 （金邊粉）船麵有牛腩、肥牛、香葉同炸豬皮，湯底好深色睇落幾正，點知一食落去估唔到咁鬼辣🔥🥵 我本身唔太食得辣，呢隻辣度對我嚟講over晒，唯有全程將金邊粉同牛隔晒湯食埋去。炸豬皮卜卜脆幾好食，但索晒湯個啲太辣唯有放棄，牛腩份量都唔少，大大舊腍身唔痴牙 *餐牌應該整個🌶 提醒下人 辣完要飲下凍嘢舒緩番個嘴，凍檸茶茶味挺濃，甜度適中。餐廳用外賣膠杯我可以埋單拎走慢慢飲，加上杯身本身好硬淨，拎返屋企洗一洗就可以用黎種下水種植物。