牛牛台式鴛鴦火鍋

營業中

休息中

雖然嘢食唔算特別好味，種類都唔係多，但畢竟價錢唔貴，場內嘅食物質素同款式都叫對得住個價。但啲服務就真係太離譜，比親啲嘢職員佢哋都唔係就咁接，係一野搶過去，無論交落單紙定埋單俾錢都係咁。最後埋單嗰陣個姐姐一行過嚟就話要埋咗張單先，然後企定定喺度唔走逼我哋要即刻埋單，但又唔俾單我哋睇，淨係自己喺度對住一疊單數數，後尾比張信用卡佢又係搶走嘅。最離譜係，攞返張信用卡返嚟嘅時候，佢竟然唔係俾返卡主(即係我)，而係就近遞俾我個朋友。因為信用卡有啲問題，比佢攞走左兩次試碌，但兩次返嚟都係俾卡我朋友而唔係比我。我朋友都呆一呆，同佢講咗句「唔係我㗎喎」，佢先好似如夢初醒咁俾返張卡我。乜而家啲信用卡可以隨便俾人㗎咩？如果我唔喺位，對面嗰個又唔係同我好熟嘅朋友，俾人盜用信用卡邊個負責？呢個已經唔係服務態度問題咁簡單，成件事好離譜！以前去過好多次，次次啲態度都令人唔太高興，只係唔算大件事所以我都算數，但今次信用卡呢個問題真係離譜得過分，忍唔住先要過嚟投訴。