鳳城酒家 (已結業)

鳳城酒家開業左好多年，係老字號，真係可以話: 「我細細個就聽過佢個名」。以前都係同屋企人食晚飯多，今日就嚟飲個午茶。呢間分店位處尖東區，交通好方便。附近多酒店，有唔少旅客嚟幫襯，唔憂做，所以全日點心係一個價錢，冇話乜野特價早茶下午茶。大點先係$23.8，尖沙咀區算係平。沙律明蝦角(大點$23.8)即炸夠晒熱辣辣，外皮炸得好脆，但唔算係好大隻，比出面食嘅較為細。清真牛肉餅(大點23.8)牛肉入面加左唔少洋蔥，一咬開就有陣陣洋葱味，可惜煎得幾油吓，碟底有唔少油。脆皮燒腩仔$48幾抵食，份量幾多，切厚件都有好多件。腩仔中間夾有幾層肥肉，但唔會過肥，外皮燒得好香好脆，掂！太白醉雞$48好奇怪，等左一個鐘先送到，醉雞一般係最先上枱的。原隻雞脾肉，多肉夠滑，雞皮做到爽口，唔錯。蓮蓉西米布甸（中點$20.8）最後一道當然係甜品，吉士醬好好味，布甸焗到帶少少煙韌。