甜品堂 (已結業)

食完新潮tapas之後, 仲想同啲朋友傾下計, 上網就搵到呢間甜品店喇。甜品店以校園為主題, 座位係學校嘅枱同凳, 仲有個黑板喺牆上做menu, 寫左有啲咩推介。裝修都幾得意。menu外表係以前讀書時嘅單行簿, 貫切呢度嘅主題。Tiramisu: 賣相好得意, 好似一座小山丘。食落味道唔錯, 甜味啱啱好, 咖啡味都香濃, 唯一美中不足係雪得太硬喇, 食到中心時, 好冰凍, 影響左成個甜品嘅口感。綠茶心太軟配紅豆雪糕: 熱辣辣上碟, 切落去見到啲綠茶漿流緊出黎, 好滿意, 收貨。趁熱食, 綠茶味唔算濃, 甜味適中。作為綠茶控嘅我會認為唔夠綠茶味, 我比較鍾意帶有甘味啲綠茶甜品。紅豆雪糕紅豆味都足夠, 唔太甜, 配埋心太軟一齊食, 冰火口感, 正。麻糬窩夫配雪糕: 賣相唔錯, 叫呢個窩夫完全比麻糬呢2個字吸引。窩夫淋上糖漿, 單食都唔錯, 窩夫軟身, 面滿滿麻糬, 食落好QQ, 都好滿足。士多啤梨味雪糕同雲尼拿雪糕都唔錯, 仲有少少生果食! 如果窩夫係脆身就更好~