河內大娘越南餐廳 (已結業)

同朋友喺尖沙咀行完街去醫肚，當然唔少得佢至愛嘅越南菜，仲有我好掛住嘅蓮子龍眼冰。餐廳食物選擇唔少，而且價錢非常合理，一直係我同朋友嘅飯堂。越南烤肉串用免治豬肉整成，外皮香脆，入口帶少少肉汁，肉味香濃，頗為香口。香茅豬扒飯份量唔細，望落雖然平平無奇，但食落係有驚喜，薑蔥油更加係靈魂。香茅豬扒雖然唔算好厚，但勝在炸得夠哂香脆，入口肉質軟腍，香茅味亦夠重夠惹味。皇牌火車頭亦係大大碗，而且材料好豐富，有生牛肉、牛腩、牛柏葉、牛丸、牛筋同扎肉，非常吸引。牛腩肉味香濃，肥瘦適中，而且煮得夠哂軟腍。牛丸非常出色，爽口彈牙，咬落去非常juicy，十分推薦！珍多冰大大杯好足料，飲落好香椰汁味，甜度適中，粉條亦落得好大方，非常滋味。蓮子龍眼冰超足料，係我嘅至愛，熱飲更加原汁原味，唔會好似出面其他舖頭咁用糖水去溝，飲落清甜滋潤，蓮子亦唔會太腍，我次次都連渣食哂。鬧市之中難得有間價錢合理嘅越南小店，食物質素有保證之餘，店員服務亦唔錯，非常推薦。