本茶 (已結業)

店舖雖小，但未行到店舖已經會聞到濃濃嘅抹茶丶焙茶丶玄米茶味。對於抹茶丶焙茶愛好者嘅我嚟講，簡直係天堂！點解？因為呢度用嘅茶粉係來自京都丶宇治三大人氣品牌：福壽園丶丸久小山園同伊藤久佑衛門。論抹茶嘅香濃，個人覺得呢3個品牌比中村藤吉更優勝。論焙茶的話，我仍然最愛中村藤吉。本來想要焙茶芭菲&抹茶芭菲，點知今日無焙茶啫喱，唯有點焙茶軟雪糕+玄米花。呢度嘅焙茶雪糕夠焙茶香，比較挺身，唔會好奶好creamy，玄米花脹卜卜又夠脆又夠香，唔會有陣烘燶味(個人覺得中村用嘅玄米花唔夠脹卜卜丶唔夠脆，而且有陣烘焦味)。呢個焙茶雪糕+玄米花簡單配搭已經令人好滿足！ 至於抹茶芭菲真係無得彈！軟雪糕上面灑咗抹茶粉，食落更香濃抹茶味，同玄米花混埋好夾，仲有北海道十勝紅豆蓉好香好棉而唔會太甜，個抹茶啫喱好軟身滑溜。食到一半，我仲食到淡淡黑蜜味道，真係超正！