鳴虎 (北帝街) (已結業)

帶狗狗到土瓜灣剪毛毛，剪完毛毛後便在附近食晚飯，土瓜灣附近有好多小店，唔係千篇一律嘅連鎖食店，上次試完炸雞米線後今次就食日本拉麵。門口非常搶眼，用咗塗鴉藝術日本字印喺玻璃窗上，牆上掛上本月精選：火焰蕃茄拉麵和東京魚介湯沾面。Menu 內有四款拉麵可供選擇，另外有一些簡單嘅日式小食。黑鳴虎$88呢個係博多黑蒜油拉麵，拉麵內有木耳，紫菜，糖心蛋，燒豚肉和白蔥。小店秘製豬骨湯質地非常濃稠，豬骨味濃，黑蒜油味道恰到好處，唔會太搶，豚肉叉燒有兩大塊，火炙得有少少焦香。另外加咗碟青蔥$8，青蔥和白蔥一齊食令到整碗麵味道更加有層次。糖心蛋雖然側邊有少少熟，不過中間亦夠流心，有好香嘅味醂味，由於原本嘅麵只有半隻糖心蛋，我哋額外叫多咗一隻蛋$8 share，好滿足。鳴海老$88豬骨湯底加上蝦和櫻花蝦粉嘅拉麵，湯底味道帶有豐富嘅櫻花蝦味，非常鮮味和濃郁，其他配料和黑鳴虎嘅一樣，個人喜歡麵質偏軟，湯底掛麵一流。芝士魚餅並魚條$38魚餅有兩款，一款係扁形，一款係條型，兩款味道其實係一樣，扁形略為多少少芝士，口感略有不同，兩款芝士味道亦夠濃郁，而且亦好彈牙，有日式嘅味道。