Oliva (已結業)

經常都冇位，而且得我同老婆兩個又食唔到好多野，所以遲遲都未去試，終於一次約左幾個friend，就去試下啦！我地叫左青口，pizza，意粉，意大利飯& 豬扒。先黎麵包同沙律，麵包唔夠鬆軟，d醋同olive oil要分配，唔係擺o係枱俾人自己倒，感覺好小家。沙律就普通啦！頭盤叫左青口，味道唔錯，個茄醬酸酸地，配合埋d蒜片，好香。如果青口改用細隻d嘅baby blue就更好。個pizza好誇張，table size，真係成張枱咁大，可揀兩款味，海鮮就普通，個辣雞就好惹味。都係個餅底唔掂，一係就薄d脆d，一係就厚d鬆d，可惜佢唔薄唔厚，唔脆唔鬆，到喉唔到肺，爭d爭d。意粉揀左蜆肉牛油汁意粉，意粉彈牙煙韌，蜆肉大大隻，牛油汁都好香。什菌意大利飯非常出色，好香芝士味，飯唔會太硬，有咬口，值得一試。豬扒都唔錯(唔記得叫咩名，不過menu得一款豬扒)，兩大塊，個汁好特別，「傑傑」地，好香芝士、香草味。整體都唔錯，o係新界區好難搵到咁有水準嘅意大利餐廳。