霸嗎拉麵 (已搬遷) 新店位置

登龍街又一間拉麵店，競爭激烈，今日兩隻馬騮游完水，兩大兩小來到，因為時間尚早，無人排隊，直入四人位坐低！地方幾迫，紅黑色為主！桌椅好近，牆上大大隻寫住最強雞湯！咁大口氣？落單食物好快到！野菜拉麵（$78）好多我最愛嘅芽菜，爽口好味湯底唔太鹹（幾驚最強係鹹到癲）湯底起膠，少許似魚翅湯嘅質感，但⋯⋯又未至於驚為天人囉！蔬菜好多！全部爽脆！拉麵有咬口！整體係好味嘅！炙燒豚肉海苔味玉拉麵（$98）媽媽食，佢食晒話好味！我分咗佢半隻食，蛋白滑，鹵得入味，蛋黃流心濃濃蛋黃味！正！羽根燒餃子（$35）個脆卜卜嘅餃子底向天，好易分開，餃子皮煙韌，餡料有蔬菜碎，比較清爽，有肉汁！好味！兒童餐（女仔）（$55）兒童餐有兩款主菜，兩隻馬騮都揀豚肉，上菜賣相幾靚，有埋可愛貓貓餐具，拉麵細碗啲，加一杯橙汁！唔使叫一碗大嘅又要攞碗仔分！店員有禮，又會比適當意見，因為我以為兒童餐主菜係用顏色分辨，佢解釋唔係，只係男仔比藍色，女仔比粉紅色，唔關主菜事！另外我問幾款餃子嘅分別，佢都好有耐性解答！服務唔錯！新開張送紙巾及抽獎！