二鍋頭 (福苑)

營業中

休息中

一向都好中意食雞煲，試過自製但失敗得好慘烈。咁啱見到旺角呢間地點勁方便，一於嚟試吓。試完係有驚喜雞肉嫩又入味，我哋選小辣，辣味好啱，好快就俾我哋清左一煲，正！呢間仲有鴨煲食，一於要試！職員即場點火幫手炒，香味撲鼻。有好香嘅香葉味。 鴨唔會好肥（因為食過有啲鴨肥到食唔到肉，所以好驚太肥）食完雞鴨煲，再打邊爐！ 佢地有好特別嘅泰皇冬蔭功鍋。打邊爐嘅菜、丸、餃、魚皮等都是自助，食材擺放係雪櫃入面，企理又乾淨！估唔到冬陰公打邊爐又幾正，酸酸辣辣咁，好開胃。生猛海蝦、活海蜆都好鮮美，蜆無沙。美國肥牛同美國豚肉都好靚唔肥。牛柏葉同鮮吊桶仔好爽脆。食材同個湯底意想不到夾。餐廳仲有好清晰嘅大電視，一邊食一邊睇電影，正！打完邊爐再嚟杯雪糕，完美！埋單仲有酒精搓手液送，好sweet原來佢地尖沙咀都開咗分店，有任食美國黑和牛套餐，下次要去試吓。