樂翻天 (已結業)

睇電視節目介紹這間新開台式餐廳，覺得店家幾有心思，是日便和屋企人一嘗究竟。週末中午未夠十二點來到，店內有十數張檯，已經有不少客人食緊，一點鐘走的時候，更加已經要等位。生意如此興隆，實在令人費解的是，樓面傳菜、落單、清潔、收銀竟然只有一名員工！這位員工雖然已經好努力想做好每一件事，可惜分身乏術，等menu、落單、等執檯，每一樣嘢都是無盡的等待....我哋由落單足足等咗半個鐘食物先上齊，嚴重懷疑後廚的人手亦有不足的情況。講返食物，午市選擇亦非常豐富，跟電視介紹，我哋選擇了屏東玉蝴蝶竹筒飯、金錢豬手、亞軍麻辣紅燒牛肉麵、鹽酥雞肉燥飯。牛肉麵湯底夠香夠辣，用料十足，麵條勁道有嚼勁，配上的滷水蛋亦非常有質素。可是麵內的紅蘿蔔多筋而且是冷的，懷疑是隔夜煮好加熱不足，成為敗筆。豬手屬於甜辣口味，略微油膩。玉蝴蝶是豬肺底部的筋肉位，不過不失。鹽酥雞肉燥飯都唔錯，尤其是肉燥的味道非常正宗，但鹽酥雞只有小小四塊，有d唔夠喉。相信如果店家可以改善人手問題，會令人印象好很多。