客家人

營業中

休息中

好耐冇同哥哥食飯，約咗放工食中菜，佢揀咗呢間位於長沙灣嘅客家菜，話前排同客人喺到食完，感覺質素唔錯。餐廳主打客家小菜，選擇亦非常多，家鄉風味濃郁，而且有唔少少見嘅手工菜。一坐低店員先為我哋上茶同小食，花生香酥脆口，伴上少量鹽粒，開胃可口。胡椒豬肚湯係我指定要點嘅，喺呢種夜晚翻風嘅日子，最適合飲返碗熱辣辣嘅豬肚湯驅寒。胡椒豬肚湯超級足料，幾乎大半盤都係湯料，湯底鮮香濃郁，鹹菜味道突出，稍微掩蓋胡椒嘅味道，飲落唔會太辣。椒鹽鮮魷非常夠鑊氣，鮮魷炸得夠香脆，咬落外層鬆脆，肉質彈牙，加上惹味嘅椒鹽同蒜粒，無論當小食抑或餸飯都一流。雜菜煲份量好足，近乎滿瀉，材料亦超級豐富，有鮮魷、蝦乾、草菇、西蘭花、白菜仔、生菜、娃娃菜、菜心、紅蘿蔔、西芹同粉絲，所有材料用清甜嘅上湯浸住，又好味又健康。食飽飽之後店員仲為我哋送上暖笠笠嘅木瓜雪耳糖水，甜度適中，夠哂滋潤，好適合最近乾燥嘅天氣。餐廳食物質素唔錯，而且份量好足，店員態度亦非常友善，令人有種賓至如歸嘅感覺，好適合一家大細用餐。