享慢煮泰 (已結業)

上個星期適逢喺堅尼地城附近返工，咁啱朋友過咗嚟搵我食lunch，於是就上嚟OpenRice睇吓有咩餐廳又可以坐得舒服，價錢又OK嘅。見到呢一間餐廳嘅評價都好好，於是就諗住嚟試一試。我今餐就食咗個佢最出名嘅龍蝦湯牛角包同埋蟹肉流心蛋龍蝦汁燴飯。首先講吓龍蝦湯牛角包，本身對呢個食物嘅期望都好高，因為見到好多客人都有叫，而且係OpenRice上面嘅評價都唔錯。咁佢一上菜嘅時候其實個包都係熱辣辣，而我一切開嘅時候，入邊嘅龍蝦汁就流出來，非常特別，而且好香口。而佢嘅燴飯都好特別，都有好濃郁嘅龍蝦味，同埋蟹肉嘅份量都唔少。但係略嫌我覺得有啲唔好嘅地方就係，因為我嗌咗兩味餸都係龍蝦湯，所以就有少少撞咗個味道，不過呢個都係我自己嘅問題，所以係唔關餐廳事嘅。整體上我都非常之推薦呢間餐廳，一嚟坐得好舒服，二來佢嘅食物都真係非常之有特色，如果經過堅尼地城嘅朋友，不妨來試一試呢一間法式fusion餐廳。