堅信號上海生煎皇 (將軍澳廣場)

營業中

休息中

話說見到堅信號同天仁茗茶聯乘，已經覺得幾得意，於是今日就同屋企人去try try。今次crossover帶嚟好有創意嘅茶飲、茶湯飯以及小籠包，本人係全部食晒嘅！先講講係人都鍾意嘅小籠包先啦，今次呢個叫「人蔘烏龍雞髀肉小籠包」，用咗天仁嘅人蔘烏龍茶製成外皮，所以小籠包顏色係呈深啡嘅。肉餡由平時嘅豬肉變成嫩滑雞髀肉，仲有少量人蔘，感覺冇咁肥之餘仲好養生😂。之後就有「櫻花蝦蟹籽大蝦香片茶湯飯」、「櫻花蝦磯燒鮑魚香片茶湯飯」，兩款最大嘅分別就係主菜，一個係大蝦，一個係磯燒鮑魚，再配以蟹籽、櫻花蝦、蟹柳絲、蛋絲、嗚門卷，賣相都靚靚仔仔。店員會喺你面前加茶湯，茶湯有淡淡香片味，食落好清新！兩款我就比較鍾意磯燒鮑魚，因為夠晒大隻又入味。之後到「豆漿豆花四季烏龍奶茶」，一啲都唔甜，好啱媽咪飲～裏面仲加咗豆腐花，有好濃豆味同四季烏龍清香。店員仲送咗crossover嘅和紙MT畀我哋（原來食聯乘套餐有得免費送），整體嚟講都唔錯，有新意。btw我仲食咗生煎包同豬扒蔥油拌麵，呢兩樣嘢真係冇得輸😂生煎包好多汁，蔥油拌麵調味啱啱好，仲要係我鍾意嘅麵條質感。