綠摩 (已結業)

放工順便去買外賣返屋企，揀咗呢間pizza店，店仔細細，主要做外賣生意，不過都有兩張枱可以立食。我見到佢哋啲嘢食都係即叫即做即焗pizza，仲有個大pizza專用爐，等緊嘢食期間一路都聞到好香。我叫左個二人餐$288，唔使諗咁多。夏威夷辣妹pizza加埋$10要呢款味，pizza 9'，係薄身脆嘅餅底，我返到屋企已經凍左，但啲邊邊仲係好脆。pizza好多車打芝士，甜甜菠蘿同火腿，好好味絕對唔會錯嘅組合。意大利肉醬伴溫泉蛋意大利粉蕃茄肉醬香濃，加上流心溫泉蛋嘅蛋液伴入意粉，每條意粉都掛滿醬汁，簡單油好食。煙三文魚芝士春卷配青芥末蛋黃醬春卷返到屋企都仲keep住脆，裏面嘅芝士凍咗之後變得煙煙韌韌，加上煙三文魚鹹香鹹香咁，再沾上芥末蛋黃醬，味道好豐富。跟餐可以揀湯或者飲品，我就揀咗餐湯，有黑松露蘑菇湯同埋忌廉粟米湯。黑松露蘑菇湯真材實料用好多蘑菇磨成茸，菇菌嘅香味好出又有黑松露增添香氣，粟米湯香甜，又有粒粒粟米，口感好好。