新南苑雞煲小菜點心 (已結業)

我諗大家茶餐廳都食得多，但係如果集合咁多種食物：港式美食、中式小炒、家常小菜、雞煲火鍋、水煮魚、煲仔飯、點心⋯真係講得出嘅地道菜式都有，呢間「新南苑」真係臥虎藏龍，有啲驚喜。今晚就點咗幾個小菜：剁椒蒸魚雲🐟切碎嘅辣椒🌶️令到成碟餸唔算太辣，魚肉非常滑身，係個汁略嫌鹹咗少少🤏🏻，鍾意食濃味嘅朋友可以試吓。我覺得最驚喜係有腸粉做配菜，煙煙韌韌有口感。椒鹽鮮魷炸到脆卜卜嘅外皮，都無阻魷魚🦑嘅彈牙，加上少少香蔥，非常惹味。重點係份量都幾多，椒鹽鮮魷用嚟送飯真係一流。蝦醬通菜炒牛肉通菜爽口、牛肉嫩滑，同蝦醬簡直係完美嘅配搭。本身天氣熱熱地都唔想食太多飯，遇上呢個餸真係白飯都食多兩啖。整體來講啲小菜都係水準之作，不過味道比較濃郁。如果鍾意食清淡嘅朋友不妨試吓叫幾個點心，餐廳點心嘅款式都好多。一大班人仲可以試埋雞煲，之後黎個打邊爐都唔錯。環境都企理乾淨，重點係價錢唔算貴，兩個人叫咗三個小菜、兩碗白飯、兩杯港式特飲埋單都只係二百幾。