屋台屋 (已結業)

落到地鐵，醒起今日無野落過肚，打算返公司食包朱古力就算，想起要寫食評，無理由買個包然後就咁寫個包下話？結果還是要死死地氣的搵間餐廳落腳。早前同事想食車仔麵，到過附近，又醒起未來過此店，趁時間尚早，就來食碗麵。十幾年歷史亦算是老字號，但近年風評不好，好歹是老字好，好不好也得一試。餐牌配搭比茶記的a、b、c、d、常餐仲要多，無眼睇亦無理由叫壽司、刺身，乾脆叫碗豬骨湯拉麵就算。麵未到，就瞄瞄附近環境，坐落真係好嘈，阿姐不時大呼小叫，又唔識斟茶，壽司吧檯的材料亂放一通，混亂得很。拉麵上來，見廚房的拉麵用日清大盤載著，懷疑是日清拉麵，配料唔多，只有筍、蔥粒、銀芽、紫菜及叉燒，分量亦唔多，賣相認真麻麻。撈勻配料後，喝啖湯，微微的豬肉味，唔夠厚亦無層次感，麵是唔錯，5分鐘內吃完的話保證唔會浸腍，叉燒都係咁，瘦多過肥，唔差，亦唔見得好。邊吃邊嗅著炭爐燒，說是備長炭，唔知真定假，但卻是坊間少見的炭燒，都好，比到個藉口自己下次來試試這裡的串燒。買單要成$56，咁既價錢不如到附近的函館去好過。p.s食友說這裡變成港式經營，所言非虛。