合和荳品

營業中

休息中

鄰近利舞台同時代廣場，但因為轉咗角，並唔多人行入晏東街呢條小食街。而我哋都係喺搵梗糖水舖做下場嗰陣誤打誤撞途經呢間「新派」荳品店。據老闆娘所講，由浸黃豆到做起豆腐都係喺呢間細細嘅鋪頭自家完成。有別於老字號，呢度menu以豆花、豆漿款式最多，同台式飲品店比亦唔輸蝕。成餐入面最滿意就係呢碗薑汁紫米豆花，mix咗兩款配料都只係$25，喺銅鑼灣恐怕只此一家。食豆腐花一定要食熱嘅！凍豆腐花雖然可以解暑，但豆腐一定會因為被雪櫃抽走水份同遇冷收縮而變鞋。薑汁豆花可不可求，呢度嘅薑汁唔係現成糖水，而且夠晒辣啱晒我胃口，薑汁配滑溜豆腐花🤤正！估唔到糖水唔係呢度嘅專業都可以做得咁好。紫米露煲得軟糯且唔稀，落足料炮製。撈勻食每啖豆花更有咬口。幾大碗，食完都飽飽地。煎釀自家出品豆腐煎得金黃香口。豆腐比較彈牙實淨，豆味冇豆花咁香，魚肉比較薄。不過因為不經調味，淡口咗啲，落啲甜醬就更好。最後嚟杯解渴豆漿。杏仁味嚟自杏霜，但凍飲杏霜溶得比較慢，飲到底先發現好足杏霜。珍珠黏韌甜糯，唔錯。總括嚟講豆腐花最抵食，係銅鑼灣下場一個唔錯嘅選擇。