沙田新強記燒鵝海鮮酒家

營業中

休息中

每次黎到大圍都會經過呢間酒樓，因為佢真係好近地鐵站，G出口一出就會見到，所以今日決定同屋企人入嚟試試佢。入到黎已經覺得好有懷舊氣息，見好多街坊都會幫襯，果然係老牌地道酒家。我地2點黎到啱啱好就係下午茶嘅時間，下午茶真係好抵食，$38.8就有兩籠點心，我地分別叫咗奶黃包、虎皮煎尖椒、金珠鹹水角同埋豉汁蒸鳳爪，每一份都各有特色。個人最推薦就係虎皮尖椒同鹹水角，虎皮尖椒大大件，咬落真係啖啖肉，唔會好油，加埋豉油真係一流！而鹹水角金黃香脆，炸得啱啱好，黎到香港真係一定要食！加$58仲有一隻燒乳鴿，我哋梗係唔放過呢個優惠，即刻加咗1隻試吓，乳鴿燒得啱啱好，皮香肉嫩，仲有小小脆，果然係招牌之一！而點心方面，我哋就叫咗香港必食嘅蝦餃燒賣，可以揀2件同4件，因為想試唔同野，我哋就揀咗2件。蝦餃飽滿，而且蝦肉鮮甜，絕對冇偷工減料，燒賣亦都好足料，唔會好似其他咁用肥豬肉包。蜜汁叉燒腸（$34）：一件有6件，咬落淡淡肉，皮薄足料，推薦！個人認為呢間酒樓絕對可以再戰！