麻甩爐海鮮雞煲私房菜 (安樂樓 (已結業)

今次帶屋企人嚟到呢一間CP值高嘅任飲任食嘅雞煲火鍋，真係大飽口福！店員好nice，同我哋介紹佢嘅特色招牌！首先會有4種雞煲款式提供選擇：招牌麻甩雞煲/藥膳花雕醉雞煲/養生蟲草花雞煲/特濃花膠雞煲；之後嘅火鍋湯底嘅小食可以選擇：招牌麻甩魚片鍋/特色酸菜魚片鍋/混你個醬卜卜蜆鍋/特濃鮮茄豬骨牛尾鍋。先食雞煲後食火鍋，而且雞煲嘅雞都係任點任食，非常正！餐廳有兩款雞煲任食套餐，一個係包含海鮮拼盤，而另一個就係普通套餐，兩者相差價錢不多，抵食又新鮮，下次再嚟嘅時候，一定會揀有海鮮嘅套餐！前菜係炸物小食，炸得非常香脆，仲有榴連炸彈！之後我哋揀咗養生蟲草花雞煲，同屋企人食緊係要一齊補補身。雞煲同蟲草份量十足，湯底香濃又美味，雞肉好嫩滑！而湯底小食就揀咗混你個醬卜卜蜆鍋，幾款醬料與卜卜蜆完美融合，香氣十足，食完之後就可以加湯打邊爐喇！火鍋配料方面，選擇種類多，包括菜類、肉類、丸類、餃類等及炸物任叫任食！牛肉都係任食，係必點！魚肉類新鮮，脆魚腩入口鮮甜多汁，口感爽脆，而且仲有白鱔任食！而蝦滑和墨魚滑自家製作真材實料，特別係蝦滑，有好多蝦肉係入面！大力推薦！