玄鮨 (已結業)

今日老母忽然豁達，帶我去左位於銅鑼灣Cubus 7樓既玄鮨。上網睇先知道餐廳連續五年獲得米芝蓮推介，今次真係大開眼界。連筷子都印咗餐廳嘅名字，果然米之蓮餐廳對任何事情都係一絲不苟。Lunch Set 總共有十款，我點既係Sashimi Lunch，母親揀左三色丼。三色丼套餐包埋茶碗蒸，入面好足料，至少有三粒蜆肉、菇、白果同豬肉，口感順滑。三色丼既三色指既係海膽、三文魚籽同吞拿魚蓉。海膽有兩排左右，入口即融，濃厚鮮味慢慢喺口腔散發，超幸福。三文魚籽超大粒同鮮甜。吞拿魚蓉特別幼細香滑，軟綿綿的口感真係難以抗拒。至於sashimi lunch 一開始會有兩款迷你前菜。牛蒡絲少少辣幾爽口。我既Sashimi Lunch終於嚟啦！ 中間厚切肥美既拖羅當然最搶眼，入口即化。其他刺身亦不容忽視，例如象拔蚌、吞拿魚等等，全部都非常新鮮。多款刺身猶如構成一幅畫，非常和諧。三色丼套餐仲有冷蕎麥麵。蕎麥麵嘅顏色特別深綠，充滿韌勁。最後就係䄂子雪糕，感覺好清新，質感出色。對我而言，今次可謂deluxe嘅體驗，希望將來能夠有能力請返老母！