大手燒 (已結業)

知道馬鞍山開咗間新嘅日本食店，主打係大手燒，其實喺電視旅遊節目亦都見過介紹過，但就冇喺日本食喎，今喺香港有機會試就第一時間同家人去試啦，大手燒佢哋有唔同嘅口味，我哋點咗軟殼蟹、明蝦芝士、同埋櫻花蝦，三個口味都唔錯，呢一類型嘅燒餅有少少似以前細個食嘅蟹片咁樣，都係好脆好易入口，會令人食到停唔到口。因為係食飯時間嘅關係，我哋亦都叫咗兩個便當，蒲燒鰻魚同埋紅酒蕃茄牛肋條，兩款味道都唔錯，牛肉好淋，鰻魚亦都惹味，兩個便當都有唔同嘅配菜同飯團，份量十足。另外我哋亦都叫咗幾款炸物，有百花釀蟹鉗，牛肉可樂餅、日式帶子、同埋炸芝士餅，點埋佢哋特製嘅沙律醬，真係超好味，百花釀蟹鉗有五星級酒店水準，可樂牛肉餅未試過，但原來個味道好夾，又係食到停唔到口，而且佢哋嘅抹茶豆腐布甸同埋伯爵奶茶都好有特色，而且亦都好啱香港人口味，唔會太甜，今日好滿足。