漢記小廚 (已結業)

呢日係九龍灣體育館做完運動，諗住同D朋友去食個晚飯， 知道啟業邨呢邊有大排檔，於是我哋決定嚟試吓！仲有個啤酒妹添！好多嘢食都想試吓呀！但係啱啱做完運動又唔敢食太多😌我覺得大排檔最唔可以少得嘅，就係韭菜豬紅啦！小小辣都幾惹味！仲有另一個大排檔唔少得嘅，就係大啤啦！做完運動，都真係有少少Guilty😂金銀蛋白菜仔，清清地，唔錯！椒鹽鮮魷，呢個真係正！啲魷魚一啲都唔會un，炸粉又唔厚，脆卜卜，正！😋😋😋油鹽水浸蜆，味就係唔錯嘅，可惜啲蜆就唔係太大隻，美中不足！最後一味，陳皮蒸多寶魚🐟，魚味鮮，都幾嫩滑！唔錯唔錯！總結而言，喺大排檔越來越少嘅大前提底下， 能夠食到唔錯嘅食物質素，呢度都真係附近唔錯嘅選擇！