Girlboss by Master Kama (已結業)

整間餐廳都係粉紅色，少女心爆發💗今次同妹妹去試左個bossy royal set，我地揀左2個餐湯（今次係南瓜湯）味道不錯，前菜方面揀左girl’s分享盤，裏面最特別係個豬軟骨餃子同埋雞串，雞串入面係有雞軟骨，所以特別有咬口，反而雞翼同米紙卷就冇乜特別，薯條除左普通薯條外仲包含蕃薯條，加埋shake粉就好食。主菜揀左一口安格斯西冷，唔會太林又唔會太韌。最後食埋海膽忌廉蟹肉意粉同埋意式龍蝦海鮮薄餅，意粉上面既蟹肉都幾多，加埋芝士同海膽，又唔會好漏，薄餅雖然好脆但上面只得一粒龍蝦，有d失望。額外叫左飲品iced chocolate fantasy，上面充滿唔同顏色既綿花糖，而且有濃濃既朱古力味，不過略嫌太甜。員工態度都幾好，提醒我地要先食個意粉，否則凍左就唔好食。要注意番前菜係可以揀2款但如果揀girl’s分享盤就只可以1款，因為佢係full portion，所以大家要睇下揀咩。另外入面冷氣都比較大，大家可以帶件外套，如果要影相既話就唔好太耐，如果唔係d食物就好快凍唒。