一糖 (屏山)

營業中

休息中

呢日同人去到天水圍，試試呢間幾出名嘅一糖。門面好日系嘅感覺，入面就簡簡單單。甜品款式幾多，由新派到傳統都有。另外仲有唔少飲品，睇落都幾吸引。餐牌寫呢杯白桃活乳酸梳打係新出嘅，杯入面預先放咗白桃汁同冰塊，梳打水同活乳酸就另外分開兩樽。先慢慢倒梳打水，再加埋活乳酸，份量可以因應自己喜好而加減。白桃配活乳酸，以為會好酸，估唔到又幾平衡。芒果冰嘅沙冰幼細，飲落透心涼。焦糖燉蛋用士多啤梨裝飾，賣相唔錯。面層焦糖唔厚唔薄，微甜同有少少微溫，下層燉蛋滑溜冰凍，表現唔錯。黑芝麻心太軟伴芒果雪糕入面啲伴碟嘅鮮雜果份量唔少，睇落幾豐富。將心太軟切開，中間嘅黑芝麻慢慢流出，流心度令人滿意。生磨芝麻窩夫伴曲奇雪糕，呢個係另一款新品嚟。窩夫質感外脆內軟，唔會太乾又唔會太腍，黑芝麻味又夠香濃。其中兩塊上面仲有燒棉花糖，令佢多咗份香甜口感，幾啱我口味。