屯の大阪章魚燒 (已結業)

屯の大阪章魚燒最初開嘅時候真係好好生意，聽講排隊排好耐，雖然我都係新界區人，但都唔係話好想襯墟，所以我到好後期先第一次食。到而家好多地方好似葵廣啊，都已經有得食章魚燒，而且聽聞評價都唔錯，所以熱潮都稍稍退落黎一點。我第一次黎食嘅時候，佢地已經換成左細版，價錢唔係太貴，又食到類似喺日本大阪食到嘅口味，所以我同朋友都幾鐘意。反而我自己唔係太鐘意實的的嘅港式章魚燒。佢地有原味、蔥、明太子、同蟹籽，最深刻印象係蔥，因為我一向唔太鐘意食青蔥，但都覺得好香口好好食，可惜之後黎左兩次都冇哂。近期呢次食，已經係9月份嘅事，佢地又再次變番做大粒版嘅章魚燒，呢啲大、細問題，純粹個人喜好，都明白好難滿足哂所有人嘅口味。有啲人覺得大粒啲，食落滿足啲，我自己就鐘意細粒啲，始終章魚燒熱辣辣，太大粒好難一野放入口。大粒版嘅章魚燒，只係多粉左，裡面依然係一粒章魚，咁只係食多左粉啫。可能因為我地一開門就去，蔥未預備好，揀左明太子同激多蟹籽兩款，感覺大版價錢都有調高左點。明太子口味比較鹹香，章魚燒粉多，章魚唔算好大粒，但新鮮熱辣，都唔會差得去邊。激多蟹籽係名符其實，真係份量激多，其實幾抵食，去超市買細細盒蟹籽都十幾蚊啦。