木葉 (已結業)

上次經過觀塘見到水牌，已經好吸引138任食豬肋條。所以今次約咗大胃王一齊去試下味道。餐廳入面有一幅綠油油嘅牆配上雅緻嘅裝修，仲好有聖誕氣氛，雖然地方細細，但係感覺好舒服。服務員好細心的詳細解釋，令我好滿意。我哋兩個人，可以一個選擇任食豬肋條套餐，另外朋友就可以自由選擇主菜再加50蚊，一樣可以任食豬肋條，佢話有多種食物嘅選擇 唔會咁悶，真係用心為客人設想。第一次嚟都驚佢啲嘢唔好食，所以食個飯飽肚啲，就叫咗香草肉碎椰菜包飯配蕃茄醬。想唔到又幾好食，椰菜包住香草碎肉炒飯夠曬香，再配埋自製蕃茄醬，夠惹味夠開胃。任食豬肋條套餐配埋薯條同自製蕃茄醬。我覺得薯條唔夠脆，但係個番茄醬就好好食， 酸酸甜甜加埋新鮮蕃茄肉同香草，真係特別好味。豬肋條處理得非常好，完全冇雪味，肉質夠嫩滑又夠淋，但仍然可以保留肉嘅質感。我就鍾意佢個BBQ醬，帶有少少酸味，食落唔會溜，而且好開胃。套餐仲有前菜蝦沙律都好新鮮㗎，而且仲有飲品㖭，所以真係好抵食 。