竹園重慶雞煲

營業中

休息中

book咗枱唔駛等位，貪佢就腳加埋大排檔隊啤豪飲嘅感覺。霸皇雞煲好惹味，特別鍾意佢開頭慢慢煮得乾乾哋身，跟住淋個辣湯落去嗰吓，大家搶住食。放冰豆腐落去，索哂啲麻辣汁，真係正到暈。有朋友唔係好食得辣，所以點咗微辣，反而因為唔太辣，個雞味好出。今次人多，叫多個胡椒豬肚羊腩雞煲，個胡椒味好濃（最怕啲鋪頭整到啲胡椒豬肚湯勁輕手，冇胡椒味），呢個湯一飲落去，個身滾咗，都未落其他料就勁飲個湯，雞好滑，豬肚都爽口。除咗雞煲，我啲朋友不停追加小食，特別係個醉豬手，啲酒落得好重手，酒味夠濃之餘仲有桂花香味，同出面食嘅醉乜醉物個味好唔同。鴨舌都正，又可以雙拼，有柄嘅鴨舌唔係周圍有得食，鹵水同麻辣都正，同埋份量都幾多，抵食。 最衰今次啲朋友唔多鍾意食羊，下次要試埋麻辣枝竹羊腩。