Viesta Express

營業中

休息中

佛誕假期嚟到天水圍探朋友，去到濕地公園附近，都算係偏遠地區，不過喺天水圍轉輕鐵過嚟都係15分鐘。呢度附近最近開咗有好多唔同嘅獨立餐廳，就等我帶你哋去試吓呢度嘅越南特色食物啦！呢度除咗室內位置，仲有戶外區域可以坐，不過相信咁炎熱嘅天氣，大家都會坐喺室內嘅！12點嘅時間入到去見到都滿咗八成人，就知佢咩料啦🤭午市套餐非常抵食，平均返都唔使$100，仲可以加錢要埋小食，送埋杯飲品俾你，環境同座椅都非常舒服，店面都算闊落。我同朋友分別點咗兩碗撈檬粉，因為實在太熱啦！佢就點咗爆脆燒腩肉撈檬，啲燒腩肉真係好大件同香脆，加埋冰凍嘅越南酸醬汁，呢個時間食真係好開胃！我就叫咗雞髀肉撈檬，雞髀肉好滑，撈檬好爽口🫶🏻另外再加咗兩款小食，越式炸春卷，同埋牛油雞翼，牛油味好重，略嫌兩隻雞翼大細唔平均，炸春卷都好香口！跟餐我地再叫咗兩款飲品，叫咗一杯凍朱古力同加錢叫咗一杯越南滴漏咖啡走煉奶 （我唔係太鍾意甜），呢杯熱咖啡真係冇得輸，個人覺得喺必點！佢哋仲新推出咗隱藏式甜品Menu🤭，我叫咗一碗芝士奶蓋紫米露，非常香濃奶味，紫米露唔會太杰，食落甜度剛剛好。