AGE Cuisine Express (已搬遷) 新店位置

今晚同男朋友食西餐，呢間餐廳係工廈入面，好易搵到。以前住附近都無黎食，估唔到搬左屋先黎食，真係好好食而且服務態度又好。我地叫左一個前菜，兩個主菜，一個加$48變套餐，再散叫個甜品，好飽。辣肉腸蘑菇酥盒熱辣辣，酥盒夠鬆脆，好出色。是日精選餐湯係煙肉薯蓉湯，味道濃郁，好多煙肉，附有餐包。椰香辣醬燒春雞配有大量邪惡既薯條，燒春雞已經一分為二，肉質嫩滑，唔鞋口，十分抵食。香煎紐西蘭原條檸檬鯰魚有驚喜，魚皮煎得香脆，魚肉同魚骨好易分離，魚肉唔腥又滑，仲鋪左層厚身既薯蓉，相當唔錯。精選意大利甜品係雲尼拿醬泡芙配開心果雪糕，擺盤有心思。再叫多個甜品：自家製意式芝士餅，誰叫我鍾意食甜品呢，哈哈。飲品叫左凍檸茶，糖醬自己落。