龍記飯店

營業中

休息中

間唔中我都會幫襯呢間龍記食燒味飯，我好鍾意食佢d叉燒，可惜今日覺得有d失望。以往我食過叉燒燒肉、叉雞、叉燒燻蹄等等都好食，點知今次叫叉燒生腸就中伏。今日d叉燒太瘦，好似柴皮咁，叉燒汁依然好味但肉質太「孩」口。生腸一咬落去係爽口但係有少少難咬爛嘅感覺，所以如果好鍾意食生腸嘅人，都係去返小食店食啦。白飯水氣好重，雖然龍記個燒味豉油好好味，但由於今日d餸麻麻地，實在難以送飯。中環太多人12-1點半期間食飯，餐廳可能太忙，服務都麻麻地。有著制服嘅呀姐們都還好，店中有一位著便服疑似老闆/店長嘅人，好無禮貌，經過時撞到我隻手兩次都無反應......我臨走前仲見到有客人比熱飲辣親，場面混亂。下次都係揀d非繁忙時間再嚟想再食返佢個正常嘅叉燒。