得龍大飯店 (已搬遷) 新店位置

琴晚有好耐不見嘅豬朋狗友聚會,有人提議到得龍吃晚飯，睇嚟大家都想豪食一晚！明明唔係好多人,都要叫兩個燒味拼盤=_=”，有油雞、燒腩仔、燒鵝、燒排骨同滷水紅腸，味道不錯。(雖然返工都成日食燒味飯)唔記得邊個話要叫個冬瓜盅，試下無壞呀! 我就最鐘意佢多料同夠熱,湯唔熱邊好飲架?!?!男人們的最愛 - 金錢雞來了，其實都唔係好知佢有啲咩料,淨係知有雞肝囉～哈哈！阿戍話啲食評寫佢用一片瘦叉燒和冰肉夾著一片燒雞肝，用整叉燒個啲蜜汁去燒架，片冰肉好似係肥豬肉。唔理LU，食咗先算！ 我最鐘意成大舊金錢雞放入口，勁滿足！鴨腳包又係依度嘅撚手嘢！佢啲燒鴨腸包住個包，好煙韌，最正就係將所有材料一次過放入口，咁樣個味道就會好突出喇！又有叉燒嘅肉香，腩肉嘅軟滑，最正當然又係雞肝的甘香。死肥仔喺度話佢肥唔食，試完都唔係咁鐘意，唔識欣賞，等我可以食埋佢個份！！叫砵酒焗桶蠔完全係自私嘅行為，因為只得兩個人食架。賺咗賺咗！「索索聲」嘅生菜加埋烤焗到好香嘅蠔，不過好似爭少少蠔味，可能啲汁和乾蔥太濃啦！我都係好鐘意食架！！食就唔係叫咗好多，不過飯就起碼每人兩碗，真係傻架～哈哈哈哈同埋下次可唔可以俾我影一影相先食呢...?