中國廚房/台灣牛肉麵

營業中

休息中

廣東道其實都幾多嘢食，前兩日食咗一間好多選擇嘅餐廳，主打台灣牛肉麵，但又有齊平時食嘅各款小炒，更加有海鮮火鍋，環境闊落，都幾適合一班朋友去食。不過當晚我哋得2個人，所以都係叫小炒。台式鍋塌豆腐豆腐本身好滑，用咗台式嘅口味，以為會偏甜，原來唔會嘅，都係咸咸地，至於鍋塌係咩意思我就唔係好知啦🤣不過都幾啱我哋口味。黑松露蘆筍百合炒雞丁加咗黑松露，好特別嘅配搭，增加成個菜嘅鮮味，佢仲有好多小菜都有落黑松露，鍾意黑松露嘅朋友記得試吓。 蟹子粉絲煲呢個煲有好多菜，啱晒想多菜少澱粉嘅我，蟹子都好足，菜同粉絲都好入味，唔錯唔錯。台灣牛肉麵最後點咗個細嘅牛肉麵，估唔到份量都咁足，湯好鮮，牛肉都好入味，好鍾意麵嘅質地，夠煙韌好有咬口，好味。餐廳仲有自家製嘅奶茶同埋豆漿，兩支都幾好飲，豆漿好重豆味，落足料。嗰晚甜品係紅豆沙，我哋梗係食埋先走，好滿意嘅一餐。