阿佳拌麵 (已結業)

阿佳拌麵新開左喺西九龍中心嘅foodcourt，食飯又多個選擇啦~餐牌方面，拌麵款式都幾多，而且有共有四種醬汁可以選擇，包括原味、沙茶、芝麻同麻辣，而小食方面都係一啲台灣夜市比較常見嘅小食，除此之外仲有麵線同埋飯等，價錢親民。台南生煎包 生煎包細細個，幾方便食，生煎包厚薄適中，外皮煎得好脆，唔會好油膩，餡料飽滿，豬肉新鮮有咬口，而且juicy。現燙魷魚原味拌麵魷魚爽口彈牙，夠鮮味，原味拌麵軟硬適中，份量多，而且醬汁味道調配幾好，甜咸甜咸幾濃郁。烏來烤豬肉腸沙茶拌麵豬肉腸肥瘦均勻，切成片厚薄適中，入口Q彈，肉汁豐盈， 肥而不膩。拌麵揀咗沙茶味，醬汁味道鹹香及微甜，配撈麵幾夾。五香糯米雞卷芝麻拌麵係一個花技巧既雞卷，將糯米釀入雞卷，糯米口感軟糯，雞肉多汁又入味，整體層次更豐富，芝麻醬拌麵食到芝麻嘅香氣同甘甜，而且芝麻醬嘅質感夠濃稠，令拌麵容易掛汁。貴妃雞卷麻辣拌麵雞卷表皮燒得夠焦脆，而入面嘅肉幾嫩，食落唔會好油膩，而麻辣拌麵香氣十足，食到花椒油嘅香味，麻辣汁唔算好辣，後勁有少少麻，唔錯！