焰淑泰國餐廳 (已結業)

今日經朋友介紹，去左v point 果頭食飯，喱間焰淑泰國餐廳應該係新開，之前都唔覺眼呢度附近有呢間餐廳。唔使點等就已經入到去，我哋都覺得呢度嘅環境唔錯，幾大，同埋都幾靚， 最適合成班朋友嚟嘅gathering 。呢度都有幾多嘢食，同埋佢每一日都會做優惠，有啲主食會做半價優惠。 星期日就有咖喱軟殼蟹配法式麵包同埋香葉燒烏頭魚。我哋就揀咗咖喱軟殼蟹，因為淨係可以揀一樣。嘢飲方面我哋就叫咗椰青沙冰同埋蝴蝶豆特飲。首先上咗嘢飲，個沙冰好清甜，好好飲，推介大家叫。而個蝴蝶豆特飲都幾得意，到左啲青檸汁落去，就會有藍色變做紫色，都幾有特色，但未到就略甜，我都係鍾意椰青沙冰。個冬陰公湯好好飲，同埋有好多材料，佢啲蝦係大蝦，味道都好好，出乎意料咁好食。個咖喱軟殼蟹都唔錯，炸得幾好，個咖喱都唔錯，但有啲咸，要點麵包先啱啱好。個生菜包肉都幾惹味，但有啲辣，要送下飯先得。至於個phad Thai 都幾好味，最鐘意佢嘅蛋網。個芒果糯米飯都幾好味，芒果幾甜，仲有斑斕糯米飯，都幾特別。仲有個好特別嘅3色甜品，但有啲甜。人均消費大概$200 左右，都幾扺食。