文記粉麵茶餐廳 (已結業)

男朋友友食過煲仔飯覺得好食，我地去左兩次。位置喺慈雲山，唔近地鐵站，可以喺黄大仙轉小巴，或者喺旺角搭紅van去。茶餐廳有室外位，睇到個廚整煲仔飯。男友至愛食啫啫骨豬潤煲仔飯加臘腸。睇見個廚炒起個啫啫骨再放上煲仔飯，好有鑊氣。排骨惹味，足料。我第一次去食，叫左肉餅窩蛋飯，個肉餅夠厚夠肉汁，加隻蛋食好好味！飯焦都好香脆。第二次食臘腸滑雞飯，雞肉好滑，臘腸半肥瘦，好香口。另外叫左碟海蜇粉蹄都好食。煲仔飯好足料，雖然位置唔就腳，但為左食好味煲仔飯，無所謂啦！好食過油麻地嘅煲仔飯。