西貢越南真味

營業中

休息中

又嚟九龍城，呢區出名多好嘢食，今次嚟石獅子道嘅「西貢越南真味」，試吓佢嘅招牌「火車頭河粉」同埋「越式牛坑腩河粉」。河粉果然出色，真心超滑，最正係即使食到尾浸耐咗，都唔會斷開曬同淋曬。湯底濃厚好味，冇加味精，飲完唔覺會口渴。「火車頭」又超級大碗，有爽彈牛丸、充滿膠質又淋嘅牛筋，牛味濃嘅安格斯牛片、嫩滑生牛片、爽脆牛栢葉、鮮甜入味蘿蔔片，再配有滿滿洋蔥、芽菜、炸蒜蔥頭，足料足味足份量；至於坑䐱就夠曬淋香。要特別重點推介佢哋嘅「牛油雞翼」，上檯夠曬熱辣辣，大大隻、香噴噴，外脆內滑。店員仲要好細心講解製作過程相當講究，先將雞翼炸一次撈起，另外用牛油炸香大量蒜片，再將雞翼放入炸蒜牛油中翻炸，讓雞翼沾上香蒜牛油，難怪咁好味啦。飲品方面，點了一杯「綠豆涼粉冰」，呢個就係常見經典飲品，至於「涼粉可樂」真係第一次見，即管又試吓佢，飲落可樂同涼粉又幾來啵。