鳳城酒家

營業中

休息中

長輩生日，指定要嚟呢度食生日飯。貪味道懷舊，嘢食好味，亦都算經濟。一行8人，最開心有大圓枱，老人家一坐低就雞啄唔斷，差啲都唔記得咗要叫嘢食。嚟咗咁多次，始終都最欣賞就係佢個炸子雞，皮脆肉滑，每一次食都好好味，從來都冇失手。另外蝦多士都係好出名，此外佢哋嘅蒸肉餅，大大碟，真係有土魷，已經唔係好多地方有得食，好啱送飯。雖然佢哋喺樓上，但如果有老人家，係地下可以由住宅大廈搭𨋢，不過就要喺廚房嗰邊入返酒樓大堂，但係都起碼唔使老人家行樓梯。服務方面，坦白講都係人手短缺，個個都忙到甩轆，俾咗少少貼士，就自然笑口常開。