北豆 Bar & Grill (已結業)

網上得知呢間位於北角既串燒小店就黎關門，諗住月底前去支持一下，所以就襯星期六同老公去食晏幫襯下。一去到啱啱有位，之後嚟個d人就開始有等枱了。另外門口企左唔少人等外賣。我地見咁多人都快快手填左菜單俾人落單先。樓面似乎得一位姐姐負責帶位同落單，佢仲要做埋出餐，所以忙到爆。我地叫左燒蘑菇，豬腩肉，厚燒牛舌，燒鱔同埋炸燒賣（加一罐汽水）。蘑菇係第一件黎，面頭係川式調味=好麻好辣😂😂我唔食得辣，所以俾左老公食買佢。又等左一段時間，個牛舌就黎啦，哩個燒得好juicy好好味，個汁都好夾，一份有兩串啱啱好。之後再等左一段時間個豬腩肉黎啦。一望就知道好好食因為真係好香油香，咬落鬆軟juicy，超正！又係一份有兩串。之後就一直冇野出……我地見越來越多人排隊同等外賣，諗住追吓單，如果未燒就取消，阿姐幫手睇完單之後就攞埋燒鱔俾我地。個膳又係油香四溢，咬落啖啖肉，調味一流。臨埋單阿姐幫我地取消左燒雞皮，同攞埋兜炸燒賣俾我地。最後我地企係門口食埋個燒賣，燒賣喺魚肉燒賣，炸得剛剛好，不過燒賣都係d大路野，好難話唔好食，亦好難話十分好食。綜合嚟睇北豆d串燒真係幾好食，有時間既話都想再幫襯下。