牧羊少年咖啡館 (已結業)

今日食晏行咗去荃灣大會堂裏面嗰間牧羊少年。 呢個位上手係好似係一間社企嘅餐廳畀牧羊少年頂左黎做。佢係大會堂地下嘅大堂裏面。離遠你就見到一大堆書喺間餐廳裏面。成間餐廳嘅裝修好簡約牆係灰色嘅紅毛泥。掛咗幾幅畫再加上成間餐廳都放滿晒舊書，畀你一種好悠閒嘅感好似喺誠品咁樣。咁嘅環境就啱曬我呢個“偽文青”坐低喺度食嘢順便睇下書。牧羊少年好歡迎你哋去捐贈啲舊書出嚟佢地仲會有咖啡券回贈返畀你添。如果你睇到有啱嘅書放低五蚊就可以攞本書返屋企 。佢哋嘅宗旨就係希望的舊書可以流轉。喺呢個對住手機多個睇書嘅世代。佢哋呢份心意係好值得讚賞同推廣出去。我哋點咗兩個意粉，蜜桃拿破崙辣肉腸意粉同埋香草醬野菌鮮蝦意粉。加一杯蘋果蜜桃鮮打綠茶。兩個意粉都係水準之上。特別係個辣肉腸意粉溝咗啲蜜桃落去一酸一辣混埋一齊非常之惹味。個野菌鮮蝦意粉炒得好香，唯一有少少comment嘅就係落多咗橄欖油。杯蘋果仙桃梳打綠茶係將蘋果肉同蜜桃肉攪爛咗喺裏面。個口感好豐富有齊生果嘅鮮味同埋唔太甜。水準之作 !食晏時間呢度都好快坐滿曬，我都唔好意思食飽之後仲攞本書嚟慢慢歎阻住人哋個位。但係果喺度食下午茶一邊嘆杯咖啡一邊攞啲書嚟睇下非常之悠閒