L'attitude (已結業)

食完串燒後唔太飽，所以附近搵左簡有主菜又有甜品既餐廳，門外玻璃櫃擺放各式各樣飲品、食品模型，造型特別吸引我地入去。🍝夢幻温泉蛋卡邦尼意粉 $88食落味道同普通卡邦尼意粉分別不大，但粉色既意粉真係第一次食，好夢幻。🥗帶子芒果他他 $98分量好大，而且色彩鮮艷，有黑松露、帶子、蔬菜、蟹肉、牛油果同芒果一層層砌成正方形盒，非常吸引。無哂海膽轉左做帶子，被切開左一片片，尚算鮮甜。蟹肉分量太多，偏咸左少少，周邊伴上三文魚籽增添口感。勝在底層有幼滑Creamy既牛油果、香甜芒果肉，好食，加哂分。🍟薯條 $58薯條即叫即炸，偏脆一點香口惹味，特別在於薯條有唔同形狀，有粗、幼、尖、方形、波浪形，有別於出面食開一式一樣。🍹藍柑奶昔 $46面層係一大球棉花糖，造型獨特，呃LIKE之選。奶昔上層有少量牛奶雪糕，香滑奶味重，都幾好食。另外奶昔呈粉藍色，好夢幻漂亮。微微柑桔味，甜度適中，我超鍾意。☕️皇家伯爵鮮奶茶 $38 另外叫左杯熱既伯爵奶茶，飲起來好順口，飄散出淡淡伯爵茶香味，茶味與奶香比例剛好，除左細杯左少少外都無野好挑剔，好飲。