川粵時光 (已結業)

朋友鍾意食辣野，就帶咗我去食銅鑼灣嘅穿越時光，錯，係川粵時光先啱！上到去真係覺得好舒服，環境開陽落地玻璃，可以見到好靚嘅景色。參考方便選擇都好多花多眼亂，我就叫我朋友直接揀，因為佢食過。前菜酸辣魚皮口感好彈牙，特別味道酸辣好開胃。口水雞質感香滑而且調味都夠香辣，又係另一開胃之作。涼拌秋葵排到整整齊齊，好似俾我哋打卡咁！保留應有水份，個size唔算大，感覺比較統一，質感爽口，有啲醋香味。主食青椒開胃清香魚大大兜好吸引，真係要好小心中間嘅青椒好辣，唔好當左係芫荽咁食！（朋友比較傻仔，食咗青椒，辣到係咁飲水）魚方面冇骨，方便懶人，而且口感香滑，原來裏面做配搭有一款啡色嘅麵，質感軟滑好得意。黃金椰菜花原來黃金係鹹蛋黃，味道鹹香而且的確係金黃嘅表面，椰菜花質感香脆。 甜品紅糖冰粉冰粉方面好滑，透明，作為晚餐完美嘅句號！ 飲品幻彩荔枝養生花茶都好特別，除咗顏色又有藍色又有紫色好打卡之外，個荔枝味都好突出，推介！