新興棧食家

營業中

休息中

今日下午我們參加完朋友嘅party之後，大姨媽就話帶我們去一間食粥都幾出名喺油麻地寧波街嘅「新興棧食家」食晚飯！一坐低喺我們諗緊食啲咩嗰陣，見到任何魚嘅位置都有得食，有基本嘅：魚雲同魚腩之外，仲有魚咀、魚卜、魚尾、魚鮫、魚骨等等等等⋯⋯本來我們都想叫魚卜嚟食吓，但可惜已賣晒！所以我們就叫咗田鷄加魚腩粥、豬膶加魚腩粥、魚咀粥同田鷄粥，一嚟到我們就覺得碗粥好大碗同超多料，同埋仲有大量嘅生菜絲舖面，感覺非常「大堆頭」，而且仲可以無限添加，感覺真係好抵食，但有啲美中不足嘅係啲生菜絲加咗入啲粥入面就會出咗啲水，不過呢啲係小問題，唔緊要啦！至於粥底就煲得好綿，而且有好鮮甜嘅魚味，因所有材料都好新鮮，所以味道非常鮮甜，魚腩嘅肉質好鮮嫩彈牙，最好嘅係都幾厚身，而田鷄嘅肉質亦好結實彈牙，而且相當肥美大隻，至於豬膶就好爽滑，唔會有「臭壓」嘅味道！另外我們再叫咗豉油皇炒麵炒得都幾乾身，味道比較濃，但未至於好鹹！而油炸鬼就炸得都幾金黃酥脆！